ஆன்மீகம்கட்டுரைகள்கிறித்தவம்வரலாறு
Trending

மதுரை சென்மேரிஸ் சர்ச் வரலாறு / Madurai Saint Mary’s Church History

History of St. Mary's Cathedral, Madurai

சுமார் 10,000 ஆண்டுகள் பழமை வரலாற்றுப் பெருமை கொண்ட மதுரையின் ஒவ்வொரு வீதியும் பல்வேறு காலகட்ட நாகரீகத்தின் தொடர்பை பறை சாற்றும் கண்ணாடியாகும். மதுரை என்றால் உலகப் புகழ் பெற்ற மீனாட்சி ஆலயம் மட்டுமே தலை சிறந்தது என்று நீங்கள் எண்ணிக் கொண்டிருந்தால், இனி அதை மாற்றிக் கொள்ளுங்கள் ஏனெனில் இங்குள்ள பல கோயில்கள் வான் உயர்ந்த வரலாற்றுச் சிறப்புகள் கொண்டது. அப்படிப்பட்ட பாரம்பரியமும், பண்பாடும், சமய ஒற்றுமையும், வரலாறும் கலந்து ஓங்கி நிற்கும் ஆலயம் மதுரை கீழமாசி வீதியில் தூய மரியன்னைப் பேராலயம்- மதுரை சென்மேரிஸ் சர்ச் (Saint Mary’s Cathedral in Madurai) ஆகும். தற்போது 175 யூபிலி ஆண்டினைக் கொண்டாடவுள்ள இப்பேராலயத்தின் அருள் பணியாளர் ஆர்.ஆரோக்கியராஜ் சேசு சபை. பார்ப்பதற்கு அழகாக உள்ளது. இதன் கட்டிட அமைப்புத் தோற்றம் வித்தியாசமாக அமைந்துள்ளது.

அவ்வளவுதானே வேறென்ன இதில் இருக்கிறது என்று நீங்கள் கேட்கும் கேள்விக்கு ? உலகளாவிய பேராலயங்களின் வரிசையில் வரலாறு பேசும் ஒரு இந்தியப் பேராலயம் இந்த கோயில் என்கிறார் ரெஜிஸ்.  இவர் தூய மரியன்னை மேல்நிலைப்பள்ளியில் ஆங்கில ஆசிரியராகவும், உதவி தலைமை ஆசிரியராக 40 ஆண்டுகள் பணிபுரிந்து தற்போது இயேசு கிறிஸ்துவின் ஆன்மாவின் நோக்கமான மனித உடல் அமைப்பு குறித்த ஆராய்ச்சிலும், தூய மரியன்னை கோவிலுடனும் இணைந்து செயல்பட்டு வருகின்றார்.

நாம் அவரைச் சந்திக்க பந்தடி 2ம் தெருவிற்குச் சென்றோம். உள்ளே நுழைந்ததும் இயேசுவின் உண்மைத் தோற்றம் புகைப்படங்களில் அதன் குறிப்புடன் தொங்க விடப்பட்டிருந்தது. அனைத்தையும் வியப்புடன் பார்த்துவிட்டு நாம் சரியான இடத்திற்குத்தான் வந்துள்ளோம் என்ற மன நிறைவுடன் கேள்விகளை கேட்கத் துவங்கினோம். நம்மிடம் அவர் கூறியது உங்களுக்கும்…

பல நூற்றாண்டுகள் பழமை வாய்ந்த மதுரையில் 500 ஆண்டுகள் வரலாற்றைத் தாங்கியது தூய மரியன்னை பேராலயம் ஆகும். இராபர்ட் டி நோபிலி, வீரமாமுனிவர் போன்ற சேசுசபை குருக்கள் ஆன்மிகத் தொண்டும், தமிழ் தொண்டும், இலக்கியம், மறை, கல்வி, சமுதாயம் என அனைத்துவிதமான தொண்டுகளும் ஆற்ற தூண்டுகோலாய் அமைந்த கோயில் இதுவாகும். (madurai st mary’s church)

வரலாறு:
இந்த கோயிலுக்கான இடம் 1840 ல் பெர்ட்ரன்டு என்ற இய¼சு சபைக் குருவால் உருவாக்கப்பட்டு 1842ஆம் ஆண்டு முதன் முதலாக சிறு கோயிலாக எழுப்பப்பட்டு இதில் புனித வியாகுல அன்னைக்கு அர்ப்பணிக்கப்பட்டது. அதன் பிறகு 1912ம் ஆண்டு மார்ச் 21ந் தேதி வியாகுல அன்னை தினத்தன்று ஹிபோலைட், லெமோத்தே ஆகியோரால் கோயில் விரிவுபடுத்தப்பட்டது. இதனிடையே 2வது உலகப் போர் சமயத்தில் உதவிகள் தடைப்பட்டதால் ஆலயக் கட்டுமானப் பணி பாதியில் நிறுத்தப்பட்டது.

அதன் பின் லிச்சர்டு முயற்சியால் 1916ஆம் ஆண்டு ஆகஸ்ட் மாதம் 15ந் தேதி கோவில் கட்டி முடிக்கப்பட்டது. இத்துடன் முடிவடையவில்லை. அடுத்தக்கட்டமாக கோயிலை மேலும் விரிவு படுத்தும் பணி 1963 ஆம் ஆண்டு ஆரம்பமானது. அந்த சமயத்தில் அருட் தந்தை டி.எம்.மத்தாய், கே.எஸ்.அருளானந்தம், எக்ஸ்.எம்.அடைக்கலம் ஆகியோரின் தீவிர முயற்சியால் 1969 ஆம் ஆண்டு ஜூலை 13ந் தேதி இன்று நாம் அனைவரும் பார்க்கும் இப்பேராலயமாக உயர்த்தப்பட்டது.

திருமலை நாயக்க மன்னருடன் தொடர்பு:
கி.பி.1606 நவம்பர் மாதம் 15ந் நாள் மதுரை வந்த இராபர்ட் டி நோபிலி என்னும் சேசு சபைக் குரு, 36 ஆண்டுகள் இப்பேராலயப் பகுதியை தலைமை இடமாகக் கொண்டு நெல்லை, திருச்சி, ராமநாதபுரம், கரூர், ஈரோடு, கோவை, ஆந்திரா, மைசூர் ஆகிய பகுதிகளில் பணி செய்ய தானே ஓர் இந்திய முறையைப் பின்பற்றிய ஆன்மிகப் கிருஸ்தவ சன்னியாசியாக மாறினார். மேலும் திருமலை மன்னரின் அவைப் புலவராயிருந்து தகவலமைப்பு ADAPTATION என்ற முறையைப் பின்பற்றி ஆன்மிகப் பணி, கல்விப்பணி, சமயப்பணி ஆகியவற்றைச் செய்தார். இவரது முயற்சியால் நாடெங்கிலும் 10,000 மாணவர்கள் கல்விப் பயன் பெற்றனர்.

இதேபோன்று 1710 லிருந்து 1714 வரை பெஸ்கி என்ற வீரமாமுனிவர் இங்குத்தங்கிப் பணி செய்துள்ளார். மேலும் இக்கோயில் பணிகள் அனைத்தும் திருமலை நாயக்கரின் பேராதரவைப் பெற்றது என்பதற்கு, இந்த ஆலயம் அரண்மனையின் மிக அருகாமையில் இருப்பதே சான்றாகும். இந்த அரண்மனையை வடிவமைத்தவர் இராபர்ட் டி நோபிலியோடு தொடர்புடைய இத்தியாலியர். இவர் அரசர், அந்தணர், ஆதினம் ஆகியோர்களோடு வைத்திருந்த நெருங்கிய உறவு திருமறை வளர்ச்சிக்கு பெரிதும் உதவியது. தமிழ்நாடு மட்டுமின்றி மைசூர், ஆந்திரா ஆகிய மாநிலங்களில் திருமறை வளர்த்த பெருமை மதுரை மி­னையேச் சாரும்.

கோயிலின் வடிவமைப்பு:
இந்த கோயிலின் வடிவமைப்பும் அழகும் மதுரையில் உள்ள வேறு எந்த ஒரு கோயிலிலும் காண முடியாது. இங்கு இரு விதமான அழகை நாம் காணலாம். ஒன்று அழகியக் கட்டுமானத்தில் உள்ள ஜரோப்பியக் கட்டிடக் கலைநுணுக்கம் மற்றொன்று கோயில் பீடத்தின் ஆன்மிக அழகு. மேலும், இப்பீடத்தில் சிலுவை அடியில் இருக்கும் இயேசு, மாதா இவர்களின் முகங்களின் அழகு பேரொளி காட்சியாகும்.(madurai st mary’s church) மேலும் கோயில் பீடத்தின் மேல் உலகப் புகழ்பெற்ற சிற்பி மைக்கேல் ஆஞ்சலோ வடிவமைத்த பியயட்டா என்றழைக்கப்படும் இறந்த இயேசுவைத் தன் மடியில் தாங்கிய வியாகுல அன்னையின் உருவம் காண்பவர்களை மெய் சிலிர்க்கவைக்கும். சிலுவை ஒரு சுகம் சுமையல்ல என்னும் ஆழ்ந்த கருத்தை வெளிப்படுத்தும் வகையில் இது அமைக்கப்பட்டுள்ளது.

கட்டிடக்கலை நுணுக்கங்கள்:
இப்பேராலயம் பல்வேறு காலங்களில் வாழ்ந்த மனிதர்களின் கருத்துக்களும், கட்டிடக் கலையும் இணைந்து மிளிரும் பெரும் படைப்பாகும். இங்கு கிரேக்க, ரோமானிய, கோத்திக், ஜெர்மன், வெனிஸ், ஸ்பெயின், மொனாட்டிக் மற்றும் போர்த்துக் கீசியக் கட்டடக் கலைகளின் ஒருங்கிணைந்த கலையாக இங்குக் காணலாம்.

இக்கோயில் உள்ள தூண்களில் கிரேக்கர்களின் டாரிக் தூண் வடிவமைப்பையும், சிறு சிறு உட்சுவர் வளைவுகளில் கோத்திக் வடிவமைப்பையும், கண்ணாடி ஜன்னல்களில் பெல்ஜிய முறையையும், பீடத்தில் இத்தாலிய வெனீ´யக் கட்டடக் கலை நுணுக்கங்களையும், சிறிய கோயில்களில் போர்த்துக்கீசிய கலையையும் காணலாம். ஆலயத்தில் மேல் கூரை, கீழ் கூரை என இரு அமைப்புக்கள் உள்ளன. (madurai st mary’s church)அவற்றில் 56 உள் வளைவுகளும் 366 அரை வளைவுகளும் உள்ளன. இவை அனைத்தும் 200 கீழ், மேல் தூண்களும் தாங்கி நிற்கின்றன. இது தவிரகோவிலின் வெளிப்புறத்தில் உள்ள 164 சிறிய கோபுரங்கள் போராலயத்திற்கு கூடுதல் அழகு.

ஹீப்ரூ கலையைப் பின்பற்றி கிரேக்க டாரிக் தூண்கள், ரோமன் தூண்கள், கோத்திக் தூண்கள் என மூன்று வகைகள் இணைந்த 100 பிரம்மாண்டத் தூண்கள் தலை நிமிர்ந்து நிற்கின்றன. இந்த தூண்கள் ஒரே கல்லால் ஆனபோதும் இதில் மூன்று நாடுகளின் கட்டிடக் கலைகள் புகுத்தப்பட்டுள்ளன. மேலும் லத்தீன் சிலுவை வடிவில் அமைக்கப்பட்ட இக்கோயில் 9 சிலுவை வடிவங்களை உள்ளடக்கியுள்ளது, பல நிறக் கண்ணாடிகள் பொருத்தப்பட்ட 80 ஜன்னல்களும், 4 அழகிய ரோஸ் கண்ணாடி ஜன்னல்களும் இங்கு உள்ளன.

கோவிலின் கோபுரங்கள் ஜெர்மன் ஸ்டீபிள் கோபுரங்களாகும். அவற்றிற்குள் KINGS BOLD என்று அழைக்கப்படும் ரஷ்ய வகையைச் சார்ந்த இரண்டு மிகப் பெரிய கோயில் மணிகள் பொருத்தப்பட்டுள்ளன. இந்த மணி மனிதர்களால் இயக்கப்படுகிறது. தினசரி நண்பகல் 12 மணி, மாலை 6 மணி என இருமுறை ஒலிக்கப்படுகிறது. மேலும் லியோனர்டோ டாவின்சியின் கடைசி இரவு உணவு காட்சியும், மைக்கில் ஆஞ்சலோவின் பியட்டா, ரபேல் என்பவரின் மடோனா ஜியோவான் பெல்லியின் உத்தரிய மாதா ஆகிய உருவங்களின் மாதிரிகளும் இங்கு உள்ளன. மேலும் இந்த கோயிலின் உச்சக்கட்ட சிறப்பு என்னவெனில் இதன் மேற்புறம் சிலுவை வடிவில் அமைந்திருப்பது தான். இந்த கிராஸ் வடிவமைப்பு மதுரைக்கு மாபெரும் பெருமை.

புதுப் பொலிவு:
இக்கோயில் பல்வேறு காலகட்டங்களில் பல்வேறு நபர்களால் பல்வேறு நாடுகளின் கலைக நுணுக்கங்கள் கலந்து கட்டப்பட்டுள்ள போதும் இதன் பொலிவினை மேலும் அழகுபடுத்தும் பணிகள் தொடர்ந்து நடைபெற்றுக் கொண்டே இருக்கின்றன. அந்த வகையில் சமீபத்தில் பேராலாயம் பழுது பார்த்து வர்ணம் பூசப்பட்டது. பேராலயப் பீடத்தையும் அதன் மேடையையும் உயர்த்தி கிரானைட் கற்கள் பதிக்கப்பட்டுள்ளன. 160ம் ஆண்டு நினைவாக அழகு நிறைந்த மூன்றடுக்குத் திருஇருதயக் கெபி கட்டப்பட்டுள்ளது.

மேலும் கோயில் (Saint Mary’s Cathedral in Madurai) வளாகத்தில் குழல் விளக்குகள் அமைக்கப்பட்டுள்ளன. கோயில் ஸ்டோர் என தனியாகக் கட்டப்பட்டு அதில் புனிதப் பொருள்கள் வைக்கப்பட்டுள்ளன. கோவிலுக்கு முன்பாக 60 அடி நீளம், 11 அடி அகலத்திற்கு கல் மேடை அமைக்கப்பட்டுள்ளது. அதேபோன்று கொடி மரம் புதிதாக அமைக்கப்பட்டு அதனைச் சுற்றி அழகுபடுத்தப்பட்டுள்ளது. கோயிலுக்குள் வியாகுல மாதாவின் சுரூபம் முன் வாசலில் மேற்கு பக்கத்தில் உள்ளது. கோபுரத்தின் நடுவில் மரியே வாழ்க என்ற வாசகம் நியான் விளக்குகளால் அலங்கரிக்கப்பட்டுள்ளது. பேராலயப் பெயர் பலகையும் டிஜிட்டல் முறையில் உள்ளது.

அருள் பணியாளர் ஆர்.ஆரோக்கியராஜ்:
இப்பேராலயத்தின் அருள் பணியாளர் ஆர்.ஆரோக்கியராஜ் சேசு சபை கூறியதாவது, சிவகங்கை மாவட்டம் எனது பூர்வீகம். கடந்த 4 ஆண்டுகளாக இந்த கோவிலில் அருள் பணியாளராக செயல்பட்டு வருகின்றேன். அனைத்து சமயத்தினரும் வந்து வழிபடும் புனித கோயிலாகும். மதுரையின் மிகப்பெரிய பழம் பெரும் கோயில் ஆகும். நான் இதற்கு முன்பாக என்னுடை குரு பட்டம் வாங்கிய பிறகு சமூகப்பணி, பங்குப் பணி ஆகியவற்றை இணைத்து செயல்பட்டேன்.

தொடக்க காலமான 1992ஆம் ஆண்டு முதல் 5 ஆண்டுகள் சிவகாசி பகுதியில் அருந்ததியர் மக்களுக்கான சமூகப் பணியில் ஈடுபட்டிருந்தேன். அதன் பிறகு 1999 ஆம் ஆண்டிலிருந்து ஏறக்குறைய 11 ஆண்டுகள் திருவண்ணாமலை பகுதியில் சமூக மற்றும் பங்குப் பணியாற்றினேன். அதன் பிறகு மூன்று வருடங்கள் கும்பகோணம் அரியலூர் மாவட்டம் திருமானூரில் பணியாற்றிய பிறகு மதுரையில் எனது பணியினைச் செய்து வருகின்றேன். இந்த கோயிலின் கீழ் 1500 குடும்பங்கள் உள்ளன. இந்த பேராலயம் மறைமாவட்டத்தின் முதன்மையான ஆலயம் ஆகும். இந்த ஆலயம் ஏசு சபை நிர்வாகத்தின் கீழ் இயங்குகிறது.

வழிபாடுகள்:
இந்த கோயிலில் தினமும் காலை, மாலை என இரு வேளை 6 மணிக்கு வழிபாடு நடத்தப்படுகிறது. இதேபோன்று இதன் கிளைப் பங்கு கோயில்களில் மாதம் ஒருமுறை வழிபாடு நடத்தப்படுகிறது. ஒவ்வொரு ஞாயிற்றுக் கிழமை அன்றும் சிறப்பு வழிபாடு நடத்தப்படுகிறது. ஞாயிற்றுக்கிழமை காலை 6 மணி, 7 மணி, மாலை 7 மணிக்கும். அதேபோன்று அன்றைய நாளில் குழந்தைகளுக்கான சிறப்பு மறைக்கல்வி பயிற்சியும் வழங்கப்படுகிறது.

மேலும் ஒவ்வொரு செவ்வாய்கிழமை மாலை அன்றும் தூய அந்தோணியார் நவநாள் எனும் வழிபாடும், வெள்ளிக்கிழமை அன்று திரு இருதய நவநாளும் வழிபாடு நடைபெறும். இதில் மாதத்தின் முதல் வெள்ளிக் கிழமை அன்று சிறப்பு வழிபாடு நடத்தப்படுகிறது. ஒவ்வொரு சனிக்கிழமை அன்றும் வியாகுல மாதாவிற்கு சிறப்பு வழிபாடுகள் செய்யப்படுகிறது. மாதத்தின் முதல் சனிக்கிழமை அன்று வியாகுல மாதா கோயிலின் வெளியே எடுத்துச் செல்லப்பட்டு ஊர்வலமாக வழிபாடு செய்யப்படுகிறது.

இதுதவிர கிறிஸ்துமஸ் விழா நாளன்று மாலை 4 மணி முதல் இரவு 10.30 மணி வரை இங்கு அமைக்கப்பட்டுள்ள இயேசுக் குடிலைக் காண ஏராளமானோர் வருகின்றனர். அன்றைய நாளில் குழந்தையில்லாத தம்பதிகளில் அதிகளவில் வேண்டிக் கொண்டு அடுத்த வருடம் குழந்தையுடன் வந்து குழந்தைகளுக்கான ஆடைகளை காணிக்கையாக கொடுக்கின்றனர். (Saint Mary’s Cathedral in Madurai) அதனை நாங்கள் ஏழை குழந்தைகளுக்கு அளிக்கின்றோம். குழந்தை வடிவில் இறைவனைக் காண்பது ஒரு வரமாகும்.அதுபோல வியாகுல மாதாவின் திருவிழா 15 நாட்கள் இங்கு வெகு விமர்சையாக நடக்கும். இதில் ஏராளமானோர் கலந்து கொண்டு வழிபடுவர். இந்த மாதாவின் சிறப்பு என்னவெனில் துன்பங்களைத் தாங்கிக் கொள்ளும் அருளை தருபவளாக விளங்குகிறார்.

தங்களது துன்பங்களை மாதாவிடம் இறக்கிவைக்க இங்கு வருபவர்களுக்கு அன்னை அதனைத் தாங்கும் வல்லமையை தருகின்றாள். இயேசு சிறு குழந்தையிலிருந்து சிலுவையில் அறையப்பட்டது வரை அவர் அடைந்த துன்பங்களை தாங்கிக் கொண்ட அன்னை என்பதால் இங்கு சிலுவையிலிருந்து இயேசு இறக்கி வைக்கப்பட்டபோது மகனை தனது மடியில் தாங்கிக் கொண்டு துன்பத்தை ஏற்றுக் கொண்ட நிலையில் உருவச்சிலை அமைக்கப்பட்டுள்ளது.

மாதாவிற்கு சேலை கட்டும் வழிபாடு:
இங்குள்ள மாதாவிற்கு புதுச் சேலை உடுத்தி வழிபடும் வழக்கம் பழங்காலமாக நிகழ்கிறது. தங்களது வேண்டுதல்கள் நிறைவேறியவுடன், அவர்கள் அன்னைக்கு புதிய புடவை வாங்கி வந்து அன்னைக்கு கட்டிய பின்பு அதனை அவர்களே மறுநாள் காணிக்கையாக வாங்கிச் செல்கின்றனர். புடவை கட்டும் வேண்டுதல் நித்தமும் இங்கு நடக்கிறது. இதுபோக சிலர் வேண்டுதலின் பேரில் தினமும் ஒரு கைப்பிடி (தவக் காலம்) அளவு அரிசியை தனியாக 40 நாட்கள் எடுத்து வைத்துக் கொண்டு, அந்நாள் இறுதியில் அதனை எங்களிடம் காணிக்கையாக கொடுப்பார்கள். அதனை நாங்கள் இயலாத ஏழைகளுக்கு பிரித்து வழங்குகின்றோம்.

திருக்கோயிலின் சமூகப் பணிகள்:
இப்பகுதியில் எங்கள் சமூகத்தைச் சார்ந்தவர்களின் பிள்ளைகள் உயர் கல்விக்கு ஒவ்வொரு ஆண்டும் ரூ.1,00,000 மதிப்பில் கல்வி உதவித் தொகை வழங்கப்படுகிறது. குறிப்பாக 10ம் மற்றும் 12ம் வகுப்பில் உயர் மதிப்பெண் எடுக்கும் மாணவ, மாணவிகளுக்கு ரூ.25,000 தொகையினை வழங்குகின்றோம். மேலும் ஏழைகளுக்கு ஒரு சிறிய தொகையினை ஒவ்வொரு மாதமும் வழங்குகின்றோம்.

எங்களது பங்கு சபையின் கீழ் பங்குப்பேரவை, புனித வின்சென்ட் தே பவுல்சபை, புனித பிரான்சிஸ்கன் 3 ஆம் சபை, குடும்ப நல்வாழ்வு இயக்கம், புனித வளனார் சான்றோர் இயக்கம், மரியாயின் சேனை, புனித மரியன்னை சமூக நல மன்றம், இளையோர் இயக்கம், மகளிர் இயக்கம், பீடச்சிறார், மறைகல்வி மற்றும் பாலர் சபை ஆகியவை இயங்கி வருகிறது. இந்த அமைப்பினர் அவரவர் இயக்கங்கள் சார்பில், பெண்களுக்கான வாழ்வியல் முன்னேற்றம், கல்வி உதவித் தொகை, திருமணம் குறித்த நிகழ்வுகள், ஏழைகளுக்கான மறு வாழ்வு என பல்வேறு சமூகப் பணிகளைச் செய்து வருகின்றனர். (Saint Mary’s Cathedral in Madurai)

இந்தக் கோவில் கடந்த நான்கு ஆண்டுகளாக என்னால் இயன்ற அளவு மக்களின் ஒத்துழைப்போடு சமூகத்திற்கும், இந்த கோவிலுக்கும் மன நிறைவாக பணிகளைச் செய்துள்ளேன். இதுவரை கிராமப்புறங்களில் மட்டுமே பணியாற்றிய நிலையில் முதன் முறையாக நகர்புறத்தில் பணியாற்றியதில் நிறைய வேறுபாடுகள் உள்ளன. மாற்றங்கள் நிறைந்த வாழ்க்கையை நாம் இறைவனின் வழிகாட்டுதலின் படி பிறருக்கு தீங்கின்றி நன்மைகளைச் செய்திட முயல வேண்டும். அப்படித்தான் கடந்த 4 ஆண்டுகளைப் போன்று எனது 5வது ஆண்டையும் இறைத் தொண்டுடன் ஆற்ற உள்ளேன் என நம்மிடம் புன்னகையுடன் தெரிவித்தார் ஆருட்பணியாளர் ஆர்.ஆரோக்கியராஜ் சே.ச. (Saint Mary’s Cathedral in Madurai)

மதுரையில் பெரும் புராதாண வரலாறு கொண்ட கோவிலில் தினமும் எல்லா சமயத்தினரும் வேறுபாடின்றி இங்கு வந்து செல்வது நமது ஒற்றுமையை வலுப்படுத்துகிறது. இங்குள்ள ஒவ்வொன்றும் ஏதாவது ஒரு நாட்டின் தனித்தன்மையை விளங்குகிறது. ஒரு மாதத்தில் குறைந்த பட்சம் 10,000 பேர்கள் வந்து செல்லும் பேராலயம் இதுவாகும். திருவிழாக்காலங்களில் ஒரு லட்சத்திற்கும் மேல் இங்கு வருகை புரிந்து அன்னையை வேண்டிக் கொள்வதுண்டு.

எல்லாவற்றையும் தாண்டி இந்தாண்டு இப்பேராலயம் தனது 175 வது ஆண்டினைக் வரும் செப்டம்பர் மாதம் வெகு விமர்சையாகக் கொண்டாட உள்ளது. நாம் சென்றிருந்தபோதே விழா களைகட்டத் துவங்கியிருந்தது. காலம் எவ்வளவு வேகமாகக் கடந்து சென்றால் என்ன ? நம் அடுத்த தலைமுறைகள் இங்கு கால் தடம் பதிக்கும்போதெல்லாம் இப்பேராலயம் தன்னைப் புதுப்பித்துக் கொள்ளும் தன் வரலாற்றை மடியில் அமர்த்திச் சொல்லி !!!

எழுத்து: மு.இரமேஷ்குமார்
வெளியீடு: ஹலோ மதுரை மாத இதழ்
ஆண்டு: 01.06.2017

Spread the love

Reporter Ramesh

15 ஆண்டுகளுக்கும் மேலாக பத்திரிக்கைதுறையில் பணிபுரிந்து வருகின்றேன். சிறப்புக் கட்டுரைகள், சிறப்புச் செய்திகள் எழுத்து வடிவிலும், காணொலியாகவும் பணியாற்றிய அனுபவம் உண்டு. பத்திரிக்கைத்துறையில் பணியாற்றுவதை பெருமையாக கருதுகின்றேன். அந்த மாபெரும் கடலில் ஒரு இலையாகவே மிதந்து தொடர்ந்து மாணவனாக கற்று வருகின்றேன். கடந்த மூன்று ஆண்டுகளாக மதுரை மாவட்டத்தில் இயங்கி வரும் ஹலோ மதுரை மாத இதழ் மற்றும் செயலிக்கு நிருபராகவும், புகைப்படக்கலைஞராகவும் பணியாற்றுகின்றேன். அலைபேசி எண்: 9566531237.

Leave a Reply

Related Articles

Back to top button
error: Copy Right Hello Madurai !!
Close
Open chat